Sumarsamvera Peppsins í Mjóddinni alla virka daga frá 11-15 í sumar!

Pepp Ísland og Sumarborgin 2020 bjóða upp á Sumarsamveru í Mjóddinni og hófst verkefnið mánudaginn 29. júní 2020 og stendur yfir til 21. ágúst eða í samtals 8 vikur.

Verkefnið snýst um að rjúfa félagslega einangrun í kjölfar Covid en félagsleg einangrun hefur komið ansi illa við marga jaðarsetta hópa og einkum fólk sem ekki stendur vel félagslega eða fjárhagslega.

Sumarsamveran er styrkt af Reykjavíkurborg en sjálfboðaliðar á vegum Pepp eiga heiðurinn að hugmyndinni og halda utan um verkefnið til að gera það að veruleika.

Sumarsamveran er haldin í húsnæði Hjálpræðishersins í Mjódd, að Álfabakka 12, og er opið þar alla virka daga á milli kl 11:00 og 15:00. Á staðnum er boðið upp á kaffi og meðlæti, fólki að kostnaðarlausu, til að tryggja að enginn þurfi að neita sér um að kíkja í kaffi og hitta annað fólk.

Markmiðið er að fólk geti droppað við og fengið sér kaffi, spjallað, prjónað, teiknað eða föndrað á staðnum, allt eftir því hvað hver vill. Einnig er hugmynd um að hægt sé að hittast og fara í göngutúr saman en leit stendur yfir að einhverjum sem gæti tekið að sér að skipuleggja slikt.

Við fögnum þeim sem vilja taka þátt og gerast sjálfboðaliðar og aðstoða okkur á einhvern hátt við þetta frábæra verkefni.

Nánari upplýsingar má fá á netfanginu peppari@internet.is eða í síma 845 1040 og á Facebook.

Fjölmiðlaverðlaun götunnar – tilnefningar fyrir 2019

Undir mjög óhefðbundnum aðstæðum í þjóðfélaginu höfum við ákveðið að streyma verðlaunaafhendingu Fjölmiðlaverðlauna götunnar í ár og hafa hana hálf-lokaða.

Afhendingin mun fara fram í safnaðarheimili Grensáskirkju, föstudaginn 13. mars kl. 15, eins og áætlað var. Við munum bjóða vinningshafa velkomna að koma og taka við verðlaunum og viðurkenningarskjölum á staðnum en einnig verður í boði að vera með okkur í gegnum streymi og Skype fyrir þá sem ekki geta komið á staðinn.

Eftirfarandi fjölmiðlafólk er tilnefnt í ár:

Alma Mjöll Ólafsdóttir

„Konur líklegri til að verða fátækar“. Stundin, 31. Ágúst.

„Þegar ég trúði því að ég væri í millistétt“. Stundin, 5. Febrúar.

Ásgeir H. Ingólfsson

„Glerborg blankheitanna”. Stundin, 18. Júní.

Bergljót Baldursdóttir

„Séreignarsparnaður nýtist ekki öryrkjum”. RÚV, 15. Mars.

Egill Páll Egilsson

„Dýrt að veikjast á Íslandi”, Mannlíf, 29. Mars.

Freyr Rögnvaldsson

„Kannski sofa þau vært vegna þess að þeim er alveg sama?”. Stundin, 4. Júlí.

„Þurfa að kveðja allt of mörg börn”. Stundin, 15. september

„Flúði hatur og hrylling”. Stundin, 15. Desember.

Gabríel Benjamín

„Fékk háa rukkun frá Tryggingastofnun niðurfellda rétt fyrir jól”. Stundin, 23. Nóvember.

Jón Bjarki Magnússon

„Huldufólkið: Þúsundir búa í iðnaðarhverfum, þar af 860 börn“. Stundin, 5. Janúar.

„Berlínarbúar vilja banna sína Gamma”. Stundin, 28. Mars.

Nadine Guðrún Yaghi

„Heimilislaust fólk í tjöldum víðsvegar á höfuðborgarsvæðinu – Stærsti hópurinn er ungt, heimilislaust fólk”. Vísir/Stöð 2, 13. Júlí.

„120 sótt um sárafátæktarstyrk – Neyddist til að borða popp í heila viku”. Vísir/Stöð 2, 4. Október.

„Fátækir hafi ekki efni á þvottaefni og dömubindum í desember”. Visir/Stöð 2, 15. Desember.

Ragna Gestsdóttir

„Ég svelti mig en vil að börnin mín borði“. DV, 27. júlí.

„Einstæð móðir sem er að ferma er föst í viðjum fátæktar – Mér líður mjög illa”. DV, 31. Mars.

Svava Jónsdóttir

„Fátækt er eins og refsing fyrir glæp sem maður framdi ekki”. Stundin, 31. Ágúst.

„Gaf barn til ættleiðingar vegna fátæktar”. Stundin, 1. September.

„Borðar popp svo börnin fái nægan mat”. Stundin, 31. Ágúst.

„Hugarfarið skiptir miklu máli í fátækt”. Stundin, 2. September.

Þórður Snær Júlíusson

„Öryrkjar fastir í fátæktargildru”. Kjarninn, 15. Mars,

Að auki hefur dómnefnd ákveðið að veita Kolbeini H. Stefánssyni sérstaka viðrurkenningu fyrir framlag sitt til fjölmiðlaumfjöllunar á árinu með skýrslugerð, greinaskrifum og viðtölum.

Fjölmiðlaverðlaun götunnar – tilnefningar óskast!

Manst þú eftir framúrskarandi umfjöllun um fátækt í íslenskum fjölmiðlum frá árinu 2019?

Var hún í útvarpi, sjónvarpi, í prentmiðli eða á netinu?

Finnst þér einhver einstaklingur, samtök eða miðill hafa staðið sig vel í að vekja athygli á stöðu fátækra eða ójöfnuði í samfélaginu?

Ef svo er sendu okkur tilnefningu (eina eða fleiri) með einhverjum af eftirfarandi leiðum:

  • Sendu okkur póst á peppiceland@gmail.com
  • Settu inn athugasemd við þessa færslu
  • Sendu okkur skilaboð á Facebook
  • Póstaðu inn í fjölmiðlaveituna okkar á Facebook (þarft að biðja um aðgang fyrst)

Allar ábendingar um gott efni vel þegnar!

Fjölmiðlaverðlaun götunnar verða afhent af grasrótarhreyfingunni Pepp Ísland í fjörða skipti þann 28. febrúar, 2020. Markmið verðlaunanna er að efla faglega, vandaða og virðingarfulla fjölmiðlaumfjöllun um fátækt og hvetja það fjölmiðlafólk sem sinnir málefninu af alúð og áhuga til dáða og áframhaldandi starfa í þágu málstaðarins.

Hver var þín uppáhalds umfjöllun um fátækt á árinu 2019?

Best fyrir…? – Morgunverðarfundur EAPN á Íslandi um fátækt og matarsóun

 

17. október á Grand hóteli frá kl. 8:30-10:30

 

17. október er alþjóðlegur baráttudagur gegn fátækt og af því tilefni ætlar EAPN á Íslandi að efna til morgunverðarfundar um málefni sem mikið hefur verið í brennidepli að undanförnu.

Umræðan um matarsóun er stór liður í baráttunni gegn hnattrænni hlýnun og fyrir bættri umhverfisvernd, en hefur einnig tengst baráttunni gegn fátækt á margan hátt.

Nokkrir umræðufletir eru á tengslum fátæktar og matarsóunar og á fundinum verður meðal annars fengist við eftirfarandi spurningar:

 

Er nýting afgangsmatar sóknarfæri í valdeflingu þeirra sem búa við fátækt?

Getum við nýtt mat sem gengur af á annan hátt en að gefa hann sem ölmusu til fátækra?

Hvernig getur nýting á afgangsmat leitt til farsældar fyrir samfélagið í heild sinni?
Frummælendur:

Rakel Garðarsdóttir, aðgerðarsinni og stofnandi samtakanna „Vakandi“.

Hjördís Elsa Ásgeirsdóttir, markaðsstjóri Krónunnar.

Kristín Ólafsdóttir, fræðslustjóri hjá Hjálparstarfi Kirkjunnar.

Hildur Oddsdóttir, fulltrúi frá Pepp Ísland.

Að erindum loknum verða umræður á borðum og hópstjórar munu lesa afrakstur umræðna í lok fundar.

Ásta Þórdís Skjalddal, samhæfingarstjóri Pepp Ísland, opnar fundinn með ávarpi og fundarstjóri er Sigfús Kristjánsson, fulltrúi þjóðkirkjunnar í stjórn EAPN á Íslandi.

Skráning fer fram hér

Fundargjald er 3000 kr. (morgunverður innifalinn) en hægt er að fá undanþágu frá greiðslu með því að haka við möguleikann „sæki um styrk fyrir greiðslu”.

Viðburðurinn á Facbook: https://www.facebook.com/events/814716232317356/

Fundurinn er haldinn í samvinnu við Velferðarvaktina.

Dumpster-Diving-LA-2

Aðalfundur EAPN á Íslandi haldinn 8. apríl

Aðalfundur EAPN á Íslandi verður haldinn í  Grensáskirkju 8. apríl n.k.  kl 14:30.

Fundurinn hefst á erindi frá Kolbeini H Stefánssyni, en hann mun kynna nýútkomna skýrslu sína um lífskjör og fátækt meðal barna á Íslandi á árunum 2014 til 2016. Fundargestum mun að erindinu loknu gefast tækifæri til að spyrja Kolbein spurninga og spjalla um niðurstöður skýrslunnar áður en hefðbundin aðalfundardagskrá tekur við.

Fundurinn er öllum opinn en atkvæðarétt á fundinum hafa aðeins 5 fulltrúar hvers aðildarfélags. Fyrir liggur ein tillaga um breytingu á lögum félagsins (sjá að neðan) sem kjósa þarf um. Lagabreytingunni er ætlað að opna á möguleika á því að fleiri sem starfa með sömu markmið geti sótt um aðild að samtökunum og starfað með okkur í baráttunni gegn fátækt.

Dagskrá aðalfundar:

  1. Kosning fundarstjóra og fundarritara.
  2. Skýrsla stjórnar lögð fram til samþykktar.
    Þá skulu þær nefndir sem starfa í þágu samtakanna skila skýrslu.
  3. Reikningar liðins starfsárs lagðir fram til samþykktar.
  4. Fjárhags- og starfsáætlun 2019 kynnt og lögð fram til samþykktar.
  5. Lagabreytingar. Tillaga að breytingu á 6. gr laga hefur verið lögð fram.
  6. Stjórnarkjör.
  7. Kosning tveggja skoðunarmanna reikninga til eins árs.
  8. Ákvörðun árgjalds.
  9. Önnur mál.

 

Með kveðju frá stjórn EAPN á Íslandi.

 


 

Lagabreytingartillaga, lögð fram á aðalfundi EAPN á Íslandi 8. apríl 2019
Um er að ræða 6. gr laga sem fjallar um hverjir geta átt aðild að samtökunum en svona hljómar greinin í núgildandi lögum:

6.gr.
„Félagsaðild er opin öllum félögum og félagasamtökum er starfa innan  þriðja geirans og grasrótarsamtökum, sem hafa á stefnuskrá sinni að vinna að málefnum fátækra og þeirra sem eru félagslega einangraðir.”

 

Tillaga að breytingu á 6. gr laganna hljómar svo:

6 .gr.

„Félagsaðild er opin öllum félögum og félagasamtökum sem og einstaklingum er starfa að staðaldri innan þriðja geirans og þeim grasrótarsamtökum, sem hafa á stefnuskrá sinni að vinna að málefnum fátækra og þeirra sem eru félagslega einangraðir.”

Ennfremur þyrfti að taka fyrir dagskrárbreytingu aðalfundar þar sem bæta þyrfti inn í dagskrána lið um að aðildarumsóknir séu kynntar, teknar fyrir og samþykktar – verði breytingartillagan að lögum.

Morgunverðarfundur EAPN á Íslandi: „Á okkar kostnað?“ Innflytjendur – auður eða útgjöld?

Föstudaginn 29. mars n.k. mun EAPN á Íslandi standa fyrir morgunverðarfundi á Grand hóteli frá kl. 8:30 til 11:00 sem ber yfirskriftina: „Á okkar kostnað? – Innflytjendur: auður eða útgjöld?“. Á fundinum verður fjallað um eldfimt málefni sem oft verður áberandi í athugasemdarkerfum fjölmiðla í hvert sinn sem málefni hælisleitenda og flóttafólks eru fréttaefni.

Oft þegar rætt er um flóttafólk, hælisleitendur og ýmsa aðra innflytjendur er fókusnum beint að þeirri aðstoð sem sumum þeirra er veitt af ríki og sveitarfélögum og hvort íslenska ríkið hafi efni á að taka á móti fleira fólki sem þarf á aðstoð að halda. Á sama tíma er gjarnan rætt um skort á úrræðum og aðgerðum fyrir fátæka íslendinga, einkum öryrkja og ellilífeyrisþega, og er hópunum þá oft stillt upp sem andstæðingum í samkeppni um aðstoð og kjarabætur.

En er málið svo einfalt?
Er bara hægt að hjálpa einum hópi en ekki öðrum?
Eru innflytjendur almennt einhver byrði á samfélaginu eða eru þeir ómissandi samfélagsauður?
Er kostnaðurinn við að styðja flóttafólk og hælisleitendur svo mikill að það þurfi að spara alla aðstoð við þá hópa?
Myndi sá sparnaður almennt skila sér til íslenskra öryrkja og annarra tekjulágra og fátækra hópa?
Þarf að velja á milli hópa til að styðja, eða er hægt að gera samfélagið betra fyrir alla?

Á fundinum verður m.a. reynt að leita svara við þessum spurningum og málin rædd frá ólíkum sjónarhornum. Frummælendur koma úr ýmsum áttum og verður dagskráin sem hér segir:

8.30 – 8.40
Setning: formaður EAPN á Íslandi, Vilborg Oddsdóttir, ávarpar fundargesti.

8.40 – 8.50
Hans Jónsson, fulltrúi Pepp á Akureyri: „Hvert fara krónurnar?“

8.50 – 9.00
Laufey Líndal Ólafsdóttir, fulltrúi Pepp í Reykjavík, háskólanemi o.fl.: „Ákjósanlegir innflytjendur: útlit, uppruni og samkeppnin um brauðmolana.”

9.00 – 9.10
Renata Emilsson Pesková, innflytjandi, segir frá sinni reynslu.

9.10 – 9.30
Þórður Snær Júlíusson, ritstjóri Kjarnans: „Útlendingagóðæri“

9.30 – 9.50
Gró Einarsdóttir, sérfræðingur Hagstofu Íslands í félagsvísum og doktor í félagssálfræði: „Félagslegar greiðslur til innflytjenda og innlendra á árunum 2007-2017“

9.50 – 10.10
Bjarni Karlsson, prestur og MA í kynlífssiðfræði: „Ólík og frjáls í einangrun: Hið ískalda umburðarlyndi neyslusamfélagsins“

10.10 – 10.30 I
Salóme Mist Kristjánsdóttir, úr stýrihópi kvennahreyfingar Öryrkjabandalagsins, með innlegg frá ÖBÍ.

10.30 – 11.00
Umræður

Fundarstjóri er Sigfús Kristjánsson, fulltrúi Þjóðkirkjunnar í stjórn EAPN

Skráning á fundinn fer fram hér og er aðgangsgjald 3200 kr. (morgunverður innifalinn)
Athugið að allir sem ekki geta greitt geta sótt um undanþágu frá greiðslu með því að haka við „sæki um styrk fyrir greiðslu“.

Viðburðinn er einnig að finna á Facebook.

Vinningshafar Fjölmiðlaverðlauna götunnar 2019

Þann 22. febrúar voru Fjölmiðlaverðlaun götunnar haldin við hátíðlega athöfn í húsakynnum Hjálpræðishersins í Mjódd. Þetta er í þriðja sinn sem verðlaunin eru veitt og var það Gabríel Benjamín, blaðamaður hjá Stundinni, sem bar sigur úr býtum í ár fyrir grein sína „Öryrkjar enn og aftur látnir sitja á hakanum“. Gabríel átti jafnframt flestar tilnefningar til verðlaunana eða alls fjórar.

Í öðru sæti höfnuðu þeir Helgi Seljan, Aðalsteinn Kjartansson og  Stefán Drengsson frá RÚV með Kveiksþáttinn „Svarta hliðin á íslenskum vinnumarkaði“. Þriðja sætið hreppti svo annar blaðamaður frá Stundinni, Jón Bjarki Magnússon, fyrir grein sína „Með þrjár háskólagráður og í fullu starfi, en samt í fjárhagslegum nauðum“.

Sérstök verðlaun hlaut Alda Lóa Leifsdóttir, annars vegar fyrir verkefnið „Fólkið í Eflingu“ og hinsvegar fyrir herferð Eflingar „Lífið á lægstu launum“ ásamt Sverri Björnssyni og auglýsingastofunni Kontór.

Að auki var heiðurskonan Bára Halldórsdóttir heiðruð sérstaklega með titlinum „Uppljóstrari götunnar“, en Bára hefur m.a. verið virk í starfi Peppsins og unnið ómetanlegt starf með pistlum sínum, myndbandsbloggum og aktivisma, til að vekja athygli á stöðu fátækra og öryrkja.

Tilnefningalistann er að finna í heild sinni hér, en tilnefndar voru einnig Viktoría Hermannsdóttir (Rás 1), Sigríður Halldórsdóttir (RÚV, sjónvarp), Aðalheiður Ámundadóttir (Fréttablaðinu) og Kristjana Guðbrandsdóttir (Fréttablaðinu).

Umsagnir dómnefndar voru þessar:

  1. Gabríel Benjamín: „Öryrkjar enn og aftur látnir sitja á hakanum“

Gríðarlega mikilvæg og þörf grein sem afhjúpar annmarka starfsgetumatsins og varpar ljósi á þær afleiðingar sem það hefur haft í för með sér í öðrum löndum. Lýsir alvarleika þess að ekki sé hlustað á viðvörunarbjöllur varðandi þetta kerfi og þeim þrýstingi sem talsmenn öryrkja upplifa frá stjórnvöldum í að þvinga það í gegn. Faglega unnin og upplýsandi umfjöllun sem kemur sýn öryrkja vel til skila. Raunsönn og mikilvæg grein.

2. Helgi Seljan, Aðalsteinn Kjartansson og Stefán Drengsson: „Svarta hliðin á Íslenskum vinnumarkaði“

Öflugur og vel unninn þáttur um dökkan veruleika félagslegs undirboðs á íslenskum vinnumarkaði. Skyggnst er inn í veruleika erlends vinnuafls og greint frá því óöryggi sem fylgir því að vera í ókunnu landi með takmörkuð réttindi og litlar upplýsingar í höndum til að komast út úr aðstæðunum. Mikilvæg og yfirgripsmikil umfjöllun sem vakti almenning til vitundar um falið vandamál, nútímaþrælahald í íslensku samfélagi, sem augljóslega skortir á eftirlit með.

3. Jón Bjarki Magnússon: „Með þrjár háskólagráður og í fullu starfi, en samt í fjárhagslegum nauðum“

Áhrifaríkt viðtal sem segir mikla sögu og lýsir vel því valdaleysi og vonleysi sem fylgir því að festast í fátæktargildrunni. Varpar ljósi á ömurlega stöðu láglaunafólks á íslenskum leigumarkaði, úrræðaleysi stjórnvalda og hvernig áhrif það hefur á líf barna að búa ekki við húsnæðisöryggi. Lýsir daglegri baráttu sem margir standa í og þeim fáránleika að menntun skili sér ekki í öruggri afkomu.

Alda Lóa Leifsdóttir: Fólkið í Eflingu

Löngu tímabær vitundarvakning um hvunndagshetjur íslensks samfélags, fólkið sem vinnur mikilvægustu störfin fyrir lægstu launin. Glæsileg framsetning þar sem persónuleikar fá að njóta sín og halda virðingu sinni undir heiðarlegum frásögnum af oft átakanlegum veruleika. Láglaunafólki gefin rödd og skömminni af fátækt skilað þangað sem hún á heima. Verkefni sem vakið hefur mikla athygli og komið af stað mikilvægri fjölmiðlaumræðu.

Alda Lóa Leifsdóttir, Sverrir Björnsson og auglýsingastofan Kontór: Líf á lægstu launum

Láglaunafólk segir sögur sínar á skemmtilegan hátt. Sýnir fram á fáránleika þess að vinna fulla vinnu en eiga samt ekki fyrir brýnustu nauðsynjum. Kemur inn á ýmsa þætti í daglegu basli láglaunafólks og undirstrikar mikilvægi þeirrar hófsömu kröfu „að fá að lifa eins og manneskja“.

Tilnefningar til Fjölmiðlaverðlauna götunnar 2019

Fjölmiðlaverðlaun götunnar verða haldin í húsakynnum Hjálpræðishersins í Reykjavík í Mjódd, föstudaginn 22. febrúar frá kl. 14-16.

Í boði verða kaffiveitingar og létt snarl og mun hljómsveitin Bee Bee and the Bluebirds mæta á svæðið og leika nokkur vel valin lög.

Verðlaunað verður fyrir starfsárið 2018 og eru eftirfarandi aðilar tilnefndir:

 

Gabríel Benjamín – Stundin:

Öryrkjar enn og aftur látnir sitja á hakanum.“ (Stundin, 13. desember, 2018)

Nýtt úrræði fyrir eldri borgara nýtist best vel stæðum körlum”. (Stundin, 18. Janúar, 2018)

Koma fram við okkur eins og við séum eign þeirra” (Stundin, 30. September, 2018)

Niðurlægð og svikin á Hótel Adam” (Stundin, 15. Júlí, 2018)

 

Jón Bjarki Magnússon – Stundin:

Með þrjár háskólagráður og í fullu starfi en samt í fjárhagslegum nauðum“ (Stundin, 30. Desember, 2018)

Þegar Lúxembúrgskt skúffufélag eignaðist heimilin okkar” (Stundin, 20. Febrúar, 2018)

 

Kristjana Guðbrandsdóttir – Fréttablaðið:

Öðruvísi fátækt í Reykjavík en í Ekvador“. (Fréttablaðið, 5. Maí, 2018)

Vill ekki verða tamin millistéttarkona í dragt“. (Fréttablaðið, 2. Júní, 2018)

Látum ekki hafa okkur að fíflum” (Fréttablaðið, 3. Mars 2018)

 

Aðalheiður Ámundadóttir – Fréttablaðið:

Fallvalt frelsi Mirjam” (Fréttablaðið, 1. September, 2018)

 

Viktoría Hermannsdóttir – Rás 1

Saga fyrrum vændiskonu” (Málið er, 7. Desember, 2018)

 

Sigríður Halldórsdóttir – RÚV, sjónvarp

Ég átti ekki í nein hús að venda” (Kveikur, 13. Mars 2018)

 

Helgi Seljan og Aðalsteinn Kjartansson – RÚV, sjónvarp

Svarta hliðin á íslenskum vinnumarkaði” (Kveikur, 2. Október, 2018)

 

Alda Lóa Leifsdóttir – Efling, stéttarfélag

Fólkið í Eflingu” (Efling, stéttarfélag og samfélagsmiðlar, 2018)

 

Alda Lóa Leifsdóttir, Sverrir Björnsson og auglýsingastofan Kontór – Efling, stéttarfélag

Líf á lægstu laununum” (Herferð fyrir Eflingu, stéttarfélag)

Velferðarvakt EAPN birtir tillögur til aðgerða gegn fátækt

EAPN-Illu3-00.jpg

Móðursamtök EAPN hafa sett á fót Velferðarvakt (Poverty Watch) sem er ætlað að beina sjónum að raunverulegum aðstæðum fólks sem býr við fátækt. Vaktin byggir á vinnu meðlima í EUISG (European Inclusion Strategies Group), hóps sem fundar þrisvar á ári um stjórnvaldsaðgerðir, samfélagsleg úrlausnarefni, lobbýisma og aðgerðir til að vekja athygli á aðstæðum fátækra um alla Evrópu. Vinna hópsins er ráðgefandi í stefnumótun Evrópuráðsins í aðgerðum gegn fátækt og aðstoðar fulltrúa þess í að átta sig á hvert skal helst líta þegar gefin eru út tilmæli í velferðarmálum fyrir hvert aðildarríki.

Nokkrir meðlimir EUISG hópsins skiluðu skýrslu um ástand í eigin landi, en skýrslurar eru ekki aðeins byggðar á tölfræði eða opinberum tölum (þótt stuðst sé við slíkt), heldur á viðtölum við hjálparsamtök og einstaklinga sem búa við fátækt. Ein slík skýrsla er í vinnslu fyrir Ísland, en hún verður tilbúin á þessu ári og verður með í næstu samantekt.

Samantektarskýrsluna er að finna hér, og hér er stutt kynning á helstu niðurstöðunum sem kynntar voru á sérstökum kynningarfundi í Brussel 29. janúar síðastliðinn.

Hér að neðan eru 10 helstu atriðin sem fram komu í skýrslunni:

  1. Fátækt er brot á grundvallarmannréttindum og afleiðing pólitískra ákvarðana. Fólk er jaðarsett sökum fátæktar og gjarnan er álitið að staða þess sé því sjálfu að kenna. Fátækt er kerfislægt vandamál sem hægt er að uppræta með pólitískum vilja.
  2. Fátækt er enn útbreidd innan Evrópusambandsins og ekki er að sjá að hún sé á undanhaldi í öllum löndum. Neyð vex víða og ekki síst falin fátækt sem oft er erfitt að mæla með almennum greiningartækjum. Falin fátækt felst t.d. í heimilisleysi og fátækt meðal innflytjenda, kvenna og vistmanna á stofnunum.
  3. Ójöfnuður (milli fólks, landa og landsvæða) er helsti orsakavaldur fátæktar. Ójöfnuður vex milli ríkra og fátækra og ríkisstjórnum hefur víða mistekist í að koma upp öflugum jöfnunartækjum. Niðurskurðar- og aðhaldsaðgerðum hefur ýmist verið haldið áfram eða viðhaldið og mikið skortir á réttláta skattadreifingu, almennilegt bóta- og lífeyriskerfi og að veita góða opinbera þjónustu fyrir alla. Mikill lífskjaramunur mælist milli dreifbýlis og þéttbýlis og sá munur virðist fara vaxandi.
  4. Sumir hópar eru í meiri hættu á að lenda í fátækt en aðrir. Börn, konur, stórar fjölskyldur, einstæðir foreldrar, ungt fólk, fólk með fatlanir, innflytjendur, Rómafólk/farandfólk, heimilislausir og þeir sem glíma við langvinnt atvinnuleysi þurfa hnitmiðaðri aðgerðir og meiri einstaklingsmiðaða aðstoð. Í sumum löndum er einnig vaxandi vandi meðal eldra fólks.
  5. Skortur á viðunandi tekjum sem duga til framfærslu er helsti vandinn, en þetta er undirstöðuatriði til þess að lifa megi með reisn. Þetta vandamál er gjarnan illmælanlegt og ekki hefur enn tekist að ná utan um það með opinberum aðgerðum.
  6. Atvinna ein og sér er ekki töfralausn gegn fátækt. Fátækt meðal vinnandi fólks er vaxandi vandamál sérstaklega þar sem stórum fyrirtækjum sem byggja á mannfjandsamlegum viðskiptamódelum og starfsháttum hefur fjölgað.
  7. Lágmarksframfærsla og bætur almannatrygginga eru ekki nægjanleg úrræði til að vernda fólk gegn fátækt. Ónægar upphæðir, háir þröskuldar og fátæktargildrur eru ekki góð leið til að fólki gangi vel að komast aftur á vinnumarkað eða taka þátt í samfélaginu. Neikvæðar skilyrðingar auka á erfiðleika fólks og veita ekki góða undirstöðu fyrir farsælan starfsferil.
  8. Skortur á húsnæði á viðráðanlegu verði (sérstaklega félagslegu húsnæði) ásamt hækkandi orku- og matarverði eru þættir sem neyða fólk til að leita mjög vafasamra og óásættanlegra úrræða. Fólk neyðist til að; steypa sér í skuldir, reiða sig á matargjafir hjálparstofnana, búa í ósamþykktu húsnæði og lenda í útburðum og heimilisleysi, lenda í lokunum á ragmagni/orkugjöfum og búa við lakari heilsu.
  9. Ójöfn tækifæri til menntunar og skert aðgengi að ýmsum menntakerfum bitnar illa á fólki á öllum aldri. Slíkt misrétti veldur því að fátækt er viðhaldið milli kynslóða. Þetta bitnar kerfisbundið á ungu fólki frá fátækari og jaðarsettum heimilum ásamt því að hindra möguleika á félagslegum hreyfanleika.
  10. Frjáls félagasamtök og grasrótarhreyfingar spila stóran þátt í að styðja, virkja og valdefla fólk sem býr við fátækt með því að veita samfélagslega þjónustu, stuðning og ráðgjöf. Víða eiga þessir aðilar nú undir högg að sækja vegna niðurskurðar, takmörkun á fjárframlögum og jafnvel skerðingu á tjáningar- og málfrelsi.

Tilnefningar til Fjölmiðlaverðlauna götunnar óskast!

Manst þú eftir framúrskarandi vandaðri og góðri fjölmiðlaumfjöllun um fátækt á Íslandi frá árinu 2018? Sendu okkur tilnefningar á peppiceland@gmail.com. Skilafrestur til 10. febrúar.

Fjölmiðlaverðlaun götunnar eru verðlaun sem afhent eru fjölmiðlafólki fyrir framúrskarandi umfjöllun um fátækt á Íslandi. Verðlaunin eru veitt fyrir alls konar fjölmiðlaefni, úr sjónvarpi, útvarpi, af vefnum sem og í prentmiðlum (dagblöðum og tímaritum).

Verðlaunin eru haldin að fyrirmynd frá systursamtökum okkar í Austurríki og er markmið þeirra fyrst og fremst að stuðla að upplýstri og vandaðri fjölmiðlaumfjöllun um fátækt. Verðlaunin eru hvatning fyrir fjölmiðlafólk til þess að fjalla af fagmennsku og virðingu um málefni fátækra en þeim er einnig ætlað að byggja brýr milli fjölmiðla og fólks sem almennt hefur ekki dagskrárvald í samfélaginu.

Þann 22. febrúar mun Pepp Ísland, samtök fólks í fátækt, standa fyrir Fjölmiðlaverðlaunum götunnar í þriðja sinn. Athöfnin fer fram í húsakynnum Hjálpræðishersins í Reykjavík í Mjódd, frá kl. 14-16.

16826141_1242663285782428_2935232494978793128_o
Verðlaunahafar Fjölmiðlaverðlauna götunnar fyrir árið 2016 fengu “Salt í grautinn”.